Patay ang 26-anyos nga lalaki sa Calamba City, Laguna matapos ginaalegar ginkastigo sang duha ka barangay tanod bangud sa paglapas sa curfew rules.
Ang biktima amo si Ernanie Lumban Jimenez, residente sang Guinayangan, Quezon apang nagatinir sa Calamba City bangud nagapangita ini sang trabaho.
Santo sa report sang Laguna Police Station, nalipong ang biktima bangud sang mga injuries nga naangkon sa insidente kun sa diin ang ginatudlo nga mga nagpangamot sa pagpangastigo amo ang mga tanod sang Barangay Turbina nga sanday Arjay Abierta kag Joel Ortiz.
Natabo ang insidente pasado las onse sang gab-i sang Myerkules sa Purok 2, Barangay Turbina sa Calamba City.
Duha ka adlaw ang nakaligad, ginbawian sang kabuhi ang biktima sa Calamba Medical Center Hospital.
Ginpahayag ni Laguna police spokesperson Lt. Col. Chitadel Gaoiran nga santo sa panaysayon sang pamilya sang biktima, sang natabo ang pagpangastigo, natumba si Jimenez kag naigu ang iya nga ulo matapos nga ginsipa sang mga tanod.
Apang kun basehan naman ang pahayag sang mga nagatiglawas sa Barangay Turbina, nagtinguha si Jimenez nga magpalagyo sang gindala ini sa barangay hall agud magpangihi.
Ginpahayag sang pihak nga kampo nga natumba si Jimenez kag na-injure bangud ginlagas siya sang mga tanod.
Sa subong, ginahulat pa ang resulta sang autopsy examination.
Ginkumpirma man sang mga pulis nga posible pasakaan sang homicide cases ang mga suspek.
Nahibaluan nga ang Laguna ang kabahin sang NCR Plus kag sang natabo ang insidente, napaidalom ini sa enhanced community quarantine (ECQ) nga may istrikto nga 6 p.m. to 5 a.m. nga curfew.
