Ginahanda na sang Department of Agriculture (DA) ang cloud seeding operations sa mga lugar nga tuman gid ka apektado sang El Niño phenomenon.
Suno kay Agriculture Assistant Secretary and spokesman Arnel de Mesa, ang Bureau of Soil and Water Management kag concerned DA regional directors ang nagapakig-angot na sa Philippine Atmospheric, Geophysical and Astronomical Services Administration (PAGASA), Office of Civil Defense kag Philippine Air Force para matigayon ang cloud seeding activities.
“Last resort” na ini suno sa opisyal kaangay sang ginhimo sa Quirino, Isabela ilabi na sa Magat Watershed.
May standby fund man nga napain para sa Region 6 ukon diri sa Western Visayas para sa posible nga cloud seeding operations.
Gintumod gid ang Western Visayas nga pinakaapektado sang init kun sa diin nagdangat na sa P1.02-billion ang balor sang halit sa sektor sang agrikultura.
Magluwas sa Western Visayas, ang ginalantaw man nga pinakaapektuhan sang El Niño amo ang bilog nga Luzon lakip ang Cordillera Administrative Region, Regions 1 (Ilocos), 2 (Cagayan Valley), 3 (Central Luzon), 4-A (Calabarzon), 4-B (Mimaropa), 5 (Bicol) kag Mindanao, lakip ang Regions 9 (Zamboanga peninsula), 11 (Davao) kag 12 (Soccsksargen).
