ILOILO- Isa na naman ka kaso sang suicide ang na-record sa Probinsya sang Iloilo.
Ang biktima ginkilala nga si alyas Lovely,17 anyos, residente sang Zarraga, Iloilo apang nagaistar temporaryo sa Batwan, Pototan kag isa ka estudyante.
Sa interview sang Bombo Radyo kay Police Staff Sergeant Raquel Cayton sang Women and Children’s Protection Desk sang Pototan Municipal Police Station, iya ginpahayag nga nakit-an na lang sang iya tiya si alyas Lovely nga nagabitay sa likod sang ila balay kag may higot nga nylon ang iya liog.
Suno kay Cayton, gintuad sang tiya nga masami nga nagakaurongan ang biktima nga iya ginlaragway nga hipuson.
Gindugang man ni Cayton nga ginapaidalom man sa therapy ang biktima bangud sa pyschological problem.
