Gindala na sa Canada ang nagkalabilin nga parte ukon debris sang Titan submersible nga naglupok sang padulong kuntani ini sa naglugdang nga barko nga Titanic.
Base sa nakit-an nga video, naputos sa white tarp ang debris kag ginabutong sang crane halin sa Horizon Arctic vessel sa St. John’s harbor sa Newfoundland.
Ini nga debris ang ginalauman nga makabulig sa imbestigasyon kun ngaa naglupok ang amo nga vessel samtang sakay ang lima ka tawo nga amo sanday OceanGate Expeditions CEO Stockton Rush; British billionaire Hamish Harding; Pakistani businessman Shahzada Dawood kag 19-anyos nga anak nga si Suleman; kag French oceanographer nga si Paul-Henri Nargeolet.
Indi pa subong maathag kun sa diin sunod dal-on ang amo nga debris.
Una na nga ginpahayag sang Canadian kag US authorities nga gin-umpisahan na ang imbestIgasyon sa amo nga insidente.
Matandaan nga sang nagligad nga semana, nakit-an sang robotic diving vehicle ang debris sa kadalumon nga 1,600 ka tapak (488 meters) halin sa bow sang Titanic nga amo ang pagtakop sang lima ka adlaw nga rescue efforts kag amo man ang adlaw sang deklarasyon nga wala sang survivor.
