Naglapaw na sa 5,000 ang numero sang kaso sang dengue sa Western Visayas subong nga tuig.
Sa Enero 1 tubtub Hulyo 9 nga data sang Department of Health, may yara na sang 5,837 ka kaso sang dengue sa rehiyon kag 34 diri ang napatay.
Sa interview sang Bombo Radyo kay Dr. Bea Camille Natalaray, spokesperson sang DOH Western Visayas, iya ginpahayag nga 423 percent ini nga mas mataas ipaanggid sa 1,160 cases kag siyam nga patay nga na-rekord sa amo man nga period sang 2021.
Sa bug-os nga rehiyon, sa Negros Occidental ang pinakadasig nga saka sa dengue cases, ginasundan sang Antique (nga yara na subong sa state of calamity), kag ang ikatatlo amo ang Iloilo Province nga may 1,212 na ka kaso halin sang Enero kag 11 naman ang patay.
Nagapanugyan ang DOH nga i-activate sang local governments ang dengue task force sa ila tagsa ka hurisdiksyon agud nga mapatuman ang nagakaigu nga paagi agud matapna ang balatian sa lamok.
Ginpahanumdom liwat ang basic nga mga butang nga dapat himuon batok sa lamok: pagguba sang mga lugar nga gina-itlugan sang lamok, pagsuksok sang light-colored clothes, kag pag-apply sang insect repellant para sa self-protection.
Sa walo ka mga barangay sa Western Visayas nga ginatumod nga dengue hotspots, isa diri ang halin sa Iloilo Province — ang Poblacion South sa Oton. ##
