ILOILO CITY- May yara na sang nalista ang Department of Agriculture Region 6 nga mga rice retailers nga wala nagasunod sa price ceiling.
Base sa Executive Order No. 39 ni President Ferdinand Marcos, Jr., ang regular milled rice ang dapat ibaligya sa P41/kilo samtang P45/kilo naman sa well milled rice.
Sa interview sang Bombo Radyo kay Ma. Teresa Solis, Chief sang Agri Business and Marketing Assistance Division sang Department of Agriculture Region 6, iya ginpahayag nga wala pa sang direktiba ang Central Office kun ano ang idagdag nga penalidad sa mga wala nagasunod sa price cap.
Sa idalom sang Republic Act No. 7581 ukon Price Act, ang violators sang price ceiling nga gin-set sang gobyerno ang mahimo mapreso sang indi magnubo sang isa ka tuig ukon magsobra sang 10 ka tuig kag multa nga indi magnubo sa P5,000 kag indi magsobra sang P1 million nakadepende sa mangin desisyon sang korte.
Apang una naman nga gin-athag ni Department of Trade Assistant Secretary Agaton Uvero nga ipaidalom sa gihapon sa due process antes nga dagdagan sang penalidad ang violator kaangay sang paghatag sa retailer sang sulat ukon notice to explain.
Suno kay Solis, may yara mismo sang directory ang ahensya sa mga rice retailers sa rehiyon bangud nagabulig man ang local government units sa pag-monitor sa mga merkado.
Dugang pa sang natungdan, sa bug-os nga Western Visayas, ang compliant sa regular milled rice ang yara sa masobra 60% samtang masobra 70% naman sa well milled rice.
Nagpasalamat man si Solis sa mga rice retailers nga nagsunod sa price cap kag nagpanugyan nga agwanta lang anay gamay bangud sa masunod nga mga inadlaw, posible nga maganubo naman ang presyo sang bugas nga ginakuha sa supplier bangud tig-alani na.
