ILOILO CITY – Ginpasidunggan sang Department of Tourism si anay President Ferdinand Marcos, Sr. sa iya nabulig sa turismo sang Pilipinas kadungan sang ika-50 nga anibersaryo sang ahensya.
Si President Ferdinand Marcos, Jr. ang nagbaton sang posthumous plaque of recognition nagikan kay Tourism Secretary Christina Frasco.
Ginlaragway sang ahensya ang kontribusyon sang nagtaliwan nga diktador sa Philippine tourism nga tuman ka importante ilabi na ang pagtukod sang Department of Tourism, 50 ka tuig ang nakaligad.
Ini ang pinaagi sa Presidential Decree No. 189 nga gin-isyu ni Marcos Sr. sang May 11, 1973, nga amo ang nagtukod sa ahensya.
Sa amo man nga selebrasyon, ginlunsyar sang ahensya ang bag-o nga slogan nga “Love the Philippines,” nga nag-ilis sang “It’s More Fun in the Philippines” nga ginlunsyar sa idalom sang Aquino administration.
Suno sa presidente, ang amo nga tourism campaign ang may tinutuyo nga mapanami pa ang eksperyensya sang mga traveler nga nagalakip sa promotion sang regional products kag pagtib-ong sang “green movements.”
