ILOILO CITY- Nagpanindugan ang Department of Education-Schools Division of Iloilo nga wala nila ginapabay-an ang mental health sang mga estudyante.
Ini may kaangtanan sa natabo nga pag-utas sang iya kaugalingon nga kabuhi sang Grade-10 student sa Maasin, Iloilo kun sa diin ang ginabasol sini amo ang tuman ka nubo nga grado nga ginhatag sang iya manunudlo.
Sa interview sang Bombo Radyo kay Mr. Leonil Salvilla,spokesperson sang Department of Education-Schools Division of Iloilo, iya ginpahayag nga aktibo sa gihapon ang Oplan Kalusugan ukon OK sa DEPED kun sa diin napaidalom diri ang mental health program sa mga eskwelahan.
Suno kay Salvilla, nagabulig man ang Iloilo Provincial Health Office sa Schools Division of Iloilo sa paghatag sang “Home, Education/Employment, Eating, Activities, Drugs, Sex and Relationships, Self harm and Depression, kag Safety” ukon HEADSSS assessment.
Paathag ni Salvilla, ang ini nga assessment ang isa ka self-administered screening tool para sa adolescents agud nga ma-check ang ila nga health history kag red flags sa HEADSS.
Dugang pa sang natungdan, may yara sang psychological first aid providers nga handa maghatag sang psychosocial first aid sa mga estudyante kag school personnel.
Nagakadapat nga equipped ang educators kag community members sa skills nga kinahanglanon agud makahatag sang immediate support.
