ILOILO CITY- Nagpahanumdom ang Department of Education sa tanan nga mga eskwelahan nga maghiwat sang Christmas parties sa simple apang makahulugan nga pamaagi.
Sa interview sang Bombo Radyo kay Mr. Hernani Escullar Jr., spokesperson sang Department of Education Region 6, iya ginpahayag nga nagpagwa Regional Director Ramir B. Uytico sang Regional Memorandum No. 893 nga nagadumili sang solicitation sang kwarta ukon regalo para sa mga aktibidadmay kaangtanan sa paskwa.
Suno kay Escullar, apisar may yara sang no collection policy, wala naman ginadumilian ang boluntaryo nga sharing sang mga ginikanan ukon estudyante nga makasarang.
Gin-athag ni Escullar nga ang mga estudyante nga indi makasarang mag-amot ang indi dapat pag- exclude sa selebrasyon.
Ginaengganyo man ang mga eskwelahan nga mag-recycle sang daan nga Christmas decorations.
Nagakadapat man nga sa sulod sang eskwelahan patigayunon ang parties.
Nahibaluan nga ang ulihi nga klase antes ang Christmas break amo ang Disyembre 15 kag magabalik sa Enero 3, 2024.
