ILOILO CITY- Positibo ang Department of Education (DEPED) Region 6 nga malapawan sang subong nga school year 2022-2023 ang narecord nga numero sang enrollees sang nagligad nga school year 2021-2022 nga yara sa masobra 2.1 million.
Sa interview sang Bombo Radyo kay Mr. Hernani Escullar Jr., spokesperson sang DEPED Region 6, iya ginpahayag nga as of July 27 nga amo ang ikatatlo nga adlaw sang enrollment, naglab-ot na sa 679,396 ang nagpa-enroll sa mga eskwelahan sa bilog nga Western Visayas.
Suno kay Escullar, may pinakamataas nga numero sang enrollees amo ang Schools Division of Iloilo nga may 138,919; ginasundan sang Schools Division of Negros Occidental nga may 115,024; kag pangatlo ang Schools Division of Bacolod City nga may 67,136 enrollees.
Nahibaluan nga magalawig tubtob sa Agusto 22 ang enrollment nga amo naman ang pagbukas sang school year 2022-2023.
