Nakahalin na sa Pilipinas ang mga tiglawas sang gobyerno nga amo ang magasapol sa mga opisyal sang gobyerno sa Kuwait agud maistoryahan ang isyu sa suspension sang paghatag sang new entry kag work visas para sa Filipino workers.
Suno kay Foreign Affairs Undersecretary Eduardo de Vega, may isa pa ka team nga maghalin subong nga Martes kag maga-istorya man sa Kuwaiti government.
Ang mga opisyal ang nagikan sa Department of Foreign Affairs, Department of Migrant Workers, kag Overseas Workers Welfare Administration.
Suno kay De Vega, indi man masolbar gilayon ang problema sa pagpauli mismo sang team, apang exploratory talks pa lamang ini nga ginalauman nga makahimo sang long-term nga solution.
Ginpahayag man nanday De Vega kag Undersecretary Hans Cacdac sang Department of Migrant Workers nga handa nga kuhaon sang Pilipinas ang deployment ban sa pagpadala sang first time nga Pinoy household service workers sa Kuwait pero may yara sang kondisyon.
Mahimo nga kakason na ang deployment ban nga ginpatuman sang Pebrero suno sa mga opisyal kun ipromisa man sang Kuwait ang proteksiyon sa mga overseas Filipino workers, kag magapabilin nga ang shelter nga temporaryo nga kaladtuan sang mga OFWs kun mapintas ang ila nga amo.
Ginpahayag ini sang mga opisyal sang ginpamangkot sang mga kongresista sa Kamara kun ano ang non-negotiable sa isyu sa mga OFW sa tunga sang ginapatuman nga entry ban kag pagsuspendi sang Kuwait sa visa para sa mga Pinoy workers nga pakadto kuntani sa amo nga pungsod. #
