Ginpasaka na sang Department of Foreign Affairs (DFA) sa Alert Level 3 ang crisis status sa Sudan bangud sa nagapadayon nga away sa tunga sang duha ka military factions nga Sudanese Armed Forces kag Rapid Support Forces.
Suno sa ahensya, makasalig ang publiko nga padayon nga gina-monitor sang Philippine Embassy in Cairo ang sitwasyon samtang nga ginahatag man ang repatriation assistance sa mga Pinoy nga naipit sa kinagamo.
Sa idalom sang sini nga alert level, ginapatuman ang voluntary repatriation kag evacuation sa mga overseas Filipino workers (OFWs).
Una na nga ginpahayag sang ahensya nga masobra 300 ka mga Pinoy ang gina-evacuate samtang nagapadayon ang ceasefire.
Samtang, may reports naman nga nagapadayon ang away kag linukpanay sa pila ka bahin sang Sudan apisar sang 72 ka oras nga ceasefire.
Sa Omdurman nga amo ang syudad nga nagasunod sa capital nga Khartoum, may yara sang linupok malapit sa TV kag radio buildings kag may nagalibot sa gihapon nga military planes.
Wala naman sang mga gatong, ginakulang ang mga doktor, kag nabudlayan ang mga tawo nga makakuha sang kuwarta kag pagkaon.
Abril 15 sang nag-sugod ang away sa tunga sang mga lider sang regular army kag rival group nga Rapid Support Forces.
Pareho nga gina-claim sang duha ka factions nga sila ang nagakontrol sang importante nga mga lugar kaangay sang airports kag army headquarters.
Wala sang access sa internet kag mahina man ang linya sang mga telepono.
Ginapahayag 459 na ang patay halin sang nagluntad ang kinagamo 11 ka adlaw na ang nagligad apang ginalantaw nga mas daku ang aktwal nga numero.
Masobra 4,000 ang nasamaran suno sa World Health Organization samtang ang pila ka parte sang Khartoum ang ginakabig naman nga war zone. ##
