Ginsabat sang Department of Foreign Affairs (DFA) nga wala sang basehan kag “misleading” ang ginapadayaw sang China nga “historic rights” sa West Philippine Sea.
Kaangot ini sa ginplastar ni Chinese foreign ministry spokesperson Wang Wenbin sang nagligad nga semana nga may mga kinamatarong sila sa ila gintawag nga “Nanhai Zhudao” ukon “South China Sea Islands.”
Pahayag sini, may “internal waters, territorial sea and contiguous zone” sila sa amo nga lugar — ila nga exclusive economic zone kag continental shelf — kag may yara sang “historic rights”.
1948 pa lamang suno kay Wang, opisyal na nga ginpaguwa sang gobyerno sang China ang dotted line nga ginpabakod pa sang nagsunod nga Chinese governments. Ang panindugan nila suno pa kay Wang ang nagasanto sa international law kag practice.
Ginbali naman ni DFA spokesperson Teresita Daza ini nga claim kag nagsiling nga ang Pilipinas ang may administrative control sa Bajo de Masinloc (Scarborough Shoal ukon ang Panatag Shoal) amo man sa west sang Palawan nga amo ang Kalayaan Island Group (nga parte sang munisipalidad sang Kalayaan, Palawan kag nagalakip sang Pag-asa Island kag Ayungin Shoal.) Ang Bajo de Masinloc kag ang Kalayaan Island Group ang pareho nga yara sa West Philippine Sea—ang parte sang South China Sea nga sulod sa exclusive economic zone sang Pilipinas.
Suno pa kay Daza, maathag ini nga nakabutang sa administrative maps sang Pilipinas sang tion sang Spanish colonial period lakip na sa 1734 Murillo Velarde Map of the Philippines.
Ginsulit man ni Daza ang nakabutang sa 2016 Arbitral Award nga wala sang legal effect ang claims sang China sa historic rights ukon iban pa nga sovereign rights ukon jurisdiction nga lapaw na sa limits sang maritime entitlements nga nakasaad sa idalom sang UN Convention on the Law of the Sea (UNCLOS).
“The Philippines maintains a firm stand against misguided claims and irresponsible actions that violate Philippine sovereignty, sovereign rights, and jurisdiction in its own maritime domain. The Philippines has never used the South China Sea issue to heighten tensions, mislead the international community, or undermine peace and stability in the region,” dugang ni Daza.
Matandaan nga una man nagsiling ang China nga gina-“mislead” sang Pilipinas ang international community. Ila man gin-insister nga wala gina-claim sang China ang bug-os nga South China Sea.#
