MANILA – Mabaskog nga ginapanindugan ni Interior and Local Government Secretary Eduardo Año ang pagdumili sa pag-angkas sa motorsiklo sa mga lugar nga napaidalom sa general community quarantine (GCQ) kun sa diin limitado man sa gihapon ang transportasyon.
Sa taped briefing sang Inter-Agency Task Force on Emerging Infectious Diseases subong nga Biyernes, Hunyo 5, ginpahayag ni Año nga indi masunod ang physical distancing nga ginapanugyan sang Deparment of Health (DOH) kun pahanugutan ang pag-angkas.
Ini matapos nga sa amo man nga briefing, ginpahayag ni Senator Christopher “Bong” Go nga posible pahanugutan na ang amo nga klase sang pagsakay indi lamang para sa mga mag-asawa kundi para sa tanan nga yara sa isa lang ka panimalay.
Sabat naman ni Año, wala man sang ginapili ang virus —mag-asawa man ukon indi — amo nga mas mataas sa gihapon ang risgo nga maglaton ang coronavirus disease 2019 (COVID-19).
Nagpasalig man ang natungdan nga temporaryo lamang ini nga polisiya kag gilayon man nga islan sang mga otoridad kun wala na ang COVID-19 sa Pilipinas.
