ILOILO CITY- Ginpangunahan ni Department of Interior and Local Government Secretary Benjamin Abalos, Jr ang Buhay Ingatan, Droga’y Ayawan (BIDA) Rise and Run from Drugs, nga gin- organisa sang Iloilo City Government.
Ang aktibidad nagatuyo nga mapalapnag sa pang-ino-ino sang publiko ang negatibo nga epekto sang iligal nga druga.
Sa interview sang Bombo Radyo kay Secretary Abalos, iy ginpahayag nga tuman ka importante ang suporta sang mga pumuluyo bangud sila ang nagaserbe nga mata sa mga nagakatabo sa ila nga palibot.
Suno sa tiglikom, kinahanglan lang nga mangin maisog ang pumuluyo nga ipahibalo sa otoridad ang sin-o man nga nagaintra sa amo nga iligal nga buluhaton.
Ginkilala naman ni Abalos ang dako nga papel sang barangay, Department of Justice, kag katapo sang media sa kampanya batok sa illegal drugs.
Nahibaluan nga ang nasambit nga fun run ang gin-intrahan sang kapin 8,500 nga mga Ilonggo, kalakip na sanday Iloilo City Mayor Jerry Trenas kag Iloilo Governor Arthur Defensor Jr.
