Nangin mainit ang diskusyon sang mga konsehal sa ginpatigayon nga session sa Iloilo City Hall may kaangtanan sa pag-lift sang deklarasyon sang Persona Non Grata batok kay OIC Engr. Roy Pacanan.
Ini nga diskusyon ang nag-ugat sang nagpagguwa sang pahayag si Pacanan nga luyag niya nga magpadulong sa opisina nanday Iloilo City Mayor Raisa Treñas kag Vice Mayor Love-Love Baronda kun e-lift na ang iya persona non grata status.
Matandaan nga gindeklarar nga Persona Non Grata si Pacanan matapos nga wala ini nagtambong sang mga ginapatigayon nga quad committee hearing may kaangtanan sa flood control projects sang DPWH-Iloilo City District Engineering Office (ICDEO).
Sa interview sang Bombo Radyo kay Majority Floor Leader Rex Marcus Sarabia, iya ginpahayag nga indi siya pabor sa pag-lift sang ‘persona non-grata’ tag kay Pacanan bangud para sa iya obligasyon gid sini nga magkadto sa hearing kag wala labot ini kun persona non-grata ini ukon indi.
Suno sa iya dapat magsunod si Pacanan sa “terms” sang Sangguniang Panlungsod sa pagpatawag sa iya sa quad committee hearing.
Nanindugan man si Sarabia nga dapat magtambong si Engr. Pacanan para sa investigation in aid of legislation angot sa ginatumod nga dysfunctional nga mga flood control projects sang nasambit nga opisina.
Samtang, ginkwestyon naman ni Iloilo City Councilor Nene Dela Llana ang kaisog ni Engr. Pacanan.
Ini kasunod sa panawagan sang konsehal nga dapat depensahan ni Pacanan ang mga isyu batok sa iya ilabi na sa delayed kag palpak nga Flood Control Project sa syudad.
Ginsiling man sini nga dapat nga magpakalalaki si Pacanan kag atubangon ang mga konsehal kag sabton ang tanan nga palamangkutanon.
Ginpanawagan man sini nga mag-resign nalang si Pacanan bangud sa padayon nga pagpamalibad nga magtambong sa quad committee hearing ng Sangguniang Panlungsod.
Ginkondenar naman sang konsehal ang pahayag ni Pacanan nga ang ginapatigayon nga imbistigayon sang konseho isa ka aid of political demolition.
Suno sa iya, wala sang pamulitika nga nagakalatabo, bangud gusto lamang sang konseho mahibaluan ang kabangdanan sa likod sang palpak kag delayed nga mga proyekto.
