Ginpanginwala sang dismissed police ang alegasyon nga naga-upod ini sa mga police operation sang Iloilo City Police Station 4.
Madumduman nga ginkilala ang dismissed police kay Jerry Villanueva nga amo man ang gina-ayam sang PNP Integrity Monitoring Enforcement Group (IMEG).
Suno kay Police Regional Office (PRO) 6 Acting Regional Director PBGen Randulf Tuaño, base man sa ila nga pag-istoryahanay ni Villanueva, ginpahayag sini nga wala siya ginagamit sang ICPS 4 bilang asset sa mga police operations.
Ginpanginwala man sini nga nakakadto siya sa nasambit nga police station matapos ang una nga pahayag sang IMEG nga nasiplatan si Villanueva sa Molo police station rason nga ginkasa ang operasyon.
Pahayag pa sini, ginahulat pa ang pinal nga resulta sa imbestigasyon sang Regional Investigation and Detective Management Division (RIDMD) lakip na ang mga alegasyon sa estasyon sang Molo.
Ginpahayag ni PBGen Tuaño, nagdesisyon ang suspetsado nga magsurrender kag gintugyan man sini ang iya issued firearms nga Taurus TS9 kag isa ka magazine.
Gin-athag man sang direktor kun ngaa sa subong lang na-rekober ang issued firearms ni Villanueva bangud sang ginpasakaan ini sang kaso gilayon ini nga Nag-AWOL ukon Absence without Leave kag wala na nakit-an rason wala man nakuha sa iya ang isa armas luthang.
Ginkumpirmar man nga ang kaso nga murder ni Villanueva ang naangot sa Britanico case sang tuig 2020.
