ILOILO CITY- Nadakpan na sang Sara Municipal Police Station ang anay pulis nga gintudlo suspek sa pag-hold up sa supervisor sang J&T Express kag pagtaban sang masobra P1 million nga dala sang biktima sa Sara, Iloilo.
Ang arestado amo si dismissed police officer Lyman John Ochenta.
Sa interview sang Bombo Radyo kay PLtCol Norlan Perante, hepe sang Sara Municipal Police Station, iya ginpahayag nga nadakpan si Ochenta sa Balasan, Iloilo matapos nga positibo ini nga na-identify sang biktima.
Wala naman madakpan ang kaupod ni Ochenta.
Nahibaluan nga maga-remit kuntani sang kwarta ang supervisor sang gintayaan sang pusil sang mga suspetsado nga sakay sa motorsiklo kag didto na nagdeklarar sang hold-up.
Hugot naman ang pagpanginwala ni Ochenta sa akusasyon batok sa iya.
Wala naman marekober ang ginabanta P1.1 million nga cash nga nataban sang mga suspetsado.
