Aprubado na sa ikaduha nga pagbasa sa Kamara ang House Bill (HB) No.9349 ukon ang ginaduso nga hagna para sa absolute divorce.
Ini nga hagna ang may full title nga “An Act reinstituting absolute divorce as an alternative mode for the dissolution of marriage” kun sa diin ang principal sponsor amo si Albay 1st district Rep. Edcel Lagman.
Opisyal nga ginpahayag sang presiding officer nga si Senior Deputy Speaker Pampanga 3rd district Rep. Aurelio “Dong” Gonzales Jr. ang pagpasar sang sini nga hagna sa second reading via viva voce ukon voice voting.
Naaprubahan ini duha ka bulan pa ang nakaligad halin sang gintugyan na ini sang House committee on population and family relations sa plenaryo. Sa masunod nga semana ginalauman nga ipatigayon ang third reading.
Ini nga hagna ang nagatuyo nga mag-reinstitute sang diborsyo bilang alternative mode sa dissolution sang “irreparably broken” ukon “dysfunctional marriage” sa idalom sang limited grounds kag well-defined judicial procedures.
Nahatagan man importansya sa sini nga hagna nga luwason ang kabataan sa sakit kag stress kasunod sang away-mag-asawa ukon mga “irreconcilable differences” sang duha.
Yari ang grounds kun sa diin mahimo ma-file ang petition para sa absolute divorce:
– grounds for legal separation sa idalom sang Family Code of the Philippines
– grounds for annulment of marriage sa idalom sang Family Code of the Philippines
– pagbulagay sang mag-asawa sang at least lima ka tuig
– psychological incapacity nga nakasaad sa Family Code of the Philippines
– irreconcilable differences; kag
– domestic ukon marital abuse ukon ang nakasaad sa Republic Act (RA) No. 9262 ukon Anti-Violence Against Women and Their Children Act of 2004.
Nahibaluan nga ang pagpamatok sang Catholic Church kag iban pa nga Christian groups ang isa sa pinakadaku nga rason kun ngaa wala nagakapasar ang divorce bill sa pungsod nga rason kun ngaa ang Pilipinas na lamang kag ang Vatican City ang nabilin nga wala gihapon sang divorce law.#
