Gina-verify na sang Department of National Defense (DND) ang report nga may yara sang Chinese research ship malapit sa Scarborough Shoal sa West Philippine Sea.
Suno kay Defense Sec. Delfin Lorenzana, ang masunod nga mangin lihok sang ahensya ang i-base sa mga matipon nga impormasyon sang maritime patrols sa lugar.
Ginasiguro sang DND nga ang Armed Forces of the Philippines (AFP) pinaagi sa Northern Luzon Command ang magahatag sang suporta sa Philippine Coast Guard kag iban pa nga ahensya agud nga masiguro kag mapatuman ang layi sa territorial waters kag sa exclusive economic zone.
Ginakonsidera ang Scarborough Shoal bilang parte sang Masinloc, Zambales.
Yara ini sa 124 nautical miles nakatundan sang probinsya kag gindeklara man sang international arbitration court bilang traditional fishing ground.
Isa ka assistant professor sa US Naval War College ang nag-tweet nga ang Chinese research vessel nga may pangalan nga “Hai Da Hao” ang nakit-an nga naga-operate 65 nautical miles ukon 120 km nasidlangan sang shoal.
Suno kay Ryan Martinson, core member sang China Maritime Studies Institute of the US-based college, ang barko ang gina-operate sang China Ocean University.
Sa pihak sang 2016 arbitral ruling nga nagapabor sa Pilipinas, padayon sa gihapon ang China sa pag-angkon sang West Philippine Sea sa diin nagahiwat pa sila sang military activities.
