Wala sang mapresentar nga data ang Department of Health (DOH) Region VI may kaangtanan sa mga vaccinees sa rehiyon nga nakabaton sang una nga dose sang COVID-19 vaccine apang nagpangindi na sa ikaduha nga dose.
Sa interview sang Bombo Radyo kay Dr. Marie Jocelyn Te, COVID-19 spokesperson sang DOH Region VI, iya ginpahayag nga ang ila latest record ang nagapakita lamang sang ‘deferral’ kag ‘refusal’.
Ang kaso sang ‘deferral’ amo ang mga nag-pre-register nga wala natublukan sang vaccine sa scheduled inoculation date bangud ‘may yara sang categories nga indi sila pwede’ ukon wala pa sa kondisyon ang lawas (halimbawa, may high blood pressure.)
Sa sini nga kaso, 7,577 ang nag-defer sa first dose, apang nagbalik ang 1,425 kag nabakunahan.
Sa second dose, 1,444 ang nag-defer apang nagbalik kag nabakunahan ang 789 sa ila.
Ang ‘refusal’ naman amo ang nagpamalibad sa bakuna samtang yara na mismo sa vaccination site kag posible bangud sa proseso nga agyan para makapabakuna.
714 ang nagpamalibad sa first dose; 74 diri ang nagpasugot man matapos ginkumbinse.
180 ang nagpamalibad sa second dose; 51 diri ang nagpasugot man matapos ginkumbinse.
