Nahisugtan sang Department of Tourism kag Tourism Promotions Board nga indi na manukot sang participation fees para sa pagpatigayon sang international fairs, exhibits, missions kag roadshows.
Ini ang kabahin sa gihapon sang padayon nga pagsuporta sang Department of Tourism sa partners kag stakeholders nila sa tunga sang krisis sa Coronavirus Disease pandemic.
Sa sulat ni Department of Tourism Sec. Bernadette Romulo-Puyat sa Tourism Congress of the Philippines iya ginpahayag nga mangin epektibo ang pagkakas sang mga participation fees subong nga tuig.
Magapatuman man sang moratorium ang ahensya sa pagpanukot sang accreditation fees sa mga bag-o nga aplikante kag maga renew sang Tourism Enterprise kag Tourism-Related Enterprises subong nga tuig.
Nagpasalig naman si Puyat, nga padayon nila nga ginatun-an ang rekomendasyon sang Tourism Congress of the Philippines agud mahagan-hagan ang epekto sang COVID-19 sa tourism industry.
Kadungan sini, nagpasalamat man si Puyat sa suporta sang tourism stakeholders sa away sang pungsod batok sa COVID-19.
