ILOILO – Amat-amat pa lang nga nagabugtaw ang sektor sang turismo sa Western Visayas bangud sang ginasuprer nga epekto sang coronavirus disease 2019 (COVID-19) pandemic.
Sa interview sang Bombo Radyo kay Department of Tourism Regional Director Atty. Helen Catalbas, iya ginpahayag nga temprano pa agud matumod kun nakabangon na ang turismo bangud binilyon ang napierde sang pamunuan umpisa sang gindumilian ang nga turista nga magsulod sa rehiyon kag nag-untat ang operasyon sang mga negosyo.
Suno kay Catalbas, ginhatagan sang prayoridad sang health sector ilabi na bangud sang nagataas nga numero sang COVID-19 cases sa Western Visayas.
Sa pamangkot kun bala magabalik na ang turismo sa bug-os nga rehiyon subong nga ginpahalugan na ang coronavirus restrictions, ginpahayag sang opisyal nga indi man gilayon mapanas sa panghuna-huna sang mga lokal nga turista ang risgo sang infection sa tion nga sila ang maglagaw.”
ANO ANG PAPEL SANG DOT?
Gin-athag man ni Catalbas nga indi mandato sang Department of Tourism ang pagpanagtag sang ayuda sa tion sang krisis.
Ini ang kasunod sang pahayag sang publiko nga daw kaangay nga wala nakit-an ang performance sang nasambit nga pamunuan umpisa sang ginpatuman ang quarantine kag apisar madamo nga tawo ang nadulaan sang trabaho.
Suno kay Catalbas, lain ang ila katungdanan sa responsibilidad sang Deparment of Social Welfare and Development (DSWD) kag sa Department of Labor and Employment.
Ginpahayag ni Catalbas nga nagapanguna ang Department of Tourism sa preparasyon, disinfection, kag sanitation sang tourist destinations agud mapat-od nga hilway sa virus ang mga empleyado kag mga bisita.
Ginlikawan man ang promotion suno sa opisyal bangud indi mahimo pabulag-bulagan lang ang infection rate sang COVID-19.
