Ginklaro ni Palace Press Officer Undersecretary Claire Castro nga wala sang rason nga manghilabut ang Malacañang sa tion nga mang-imbestigar ang National Bureau of Investigation sa iban pa nga mga opisyal sang gobyerno nahanungod sa ginapahayag nga iregularidad sa 2019 SEA Games.
Suno kay Castro, isa sa mga gin-imbestigaran amo si Department of Public Works and Highways Secretary Vince Dizon, apang nahibaluan nga wala man ini sang sala sa nasambit nga isyu kag ginbasura na ang kaso batok sa opisyal.
Ginpakigbahin man sini nga wala pa maibestigaran sadto si Senator Alan Peter Cayetano, bangud natinluan na sang Duterte administration ang pangalan sini antes pa ang pormal nga imbestigasyon batok sa senador.
May kaangtanan ini sa liwat nga pag-imbestigar sang NBI kay Cayetano bangud ini ang nagpanguna sa Philippine Southeast Asian Games Organizing Committee sa 2019 SEA Games nga ginapahayag may ara sang anomalya.
