Nagpasalig si Department of Public Works and Highways (DPWH) Secretary Mark Villar sa publiko nga mangin doble ang ila pagpangabudlay agud gilayon nga matapna ang ginaalegar kurapsyon sa sulod sang ahensya nga una na ginwaragwag ni Presidente Rodrigo Duterte.
Suno kay Villar, mangin agresibo ang iya gintukod nga task force agud tutukan ang mga anomaliya nga ginakaulamiran sang pila ka mga opisyal.
Nahibaluan nga una na ginpahayag sang mga senador nga may pila ka empleyado sa DPWH nga nagapangayo sang “kickbacks” sa contractors nga amo ang nagahimo sang proyekto sang ahensya.
Suno naman kay Villar, magapakig-angot ang task force sa iban pa nga ahensya sang gobyerno agud mapatuman ang anti-corruption measures.
Samtang, nagapati ang Malacañang nga dapat hatagan sang publiko sang tsansa ang DPWH nga tapnaon ang ginaalegar kurapsyon sa sulod sang ahensya.
Suno kay Presidential Spokesman Harry Roque, ini ang una nga tikang sang talatapan agud nga iaddress ang isyu nga ginwaragwag sang presidente.
Matandaan nga una na nagpahayag ang palasyo nga may yara sang “full trust and confidence” si Duterte kay Villar bangud ginapahayag bilyonaryo na kag tuman ka manggaranon si Villar kag indi na ini magpasakop pa sa anuman nga kurapsyon.
Suno kay Roque, gina-welcome sang Malacañang ang findings sang task force nga gintukod ni Villar.
