Ginkumpirma sang Quezon City Police District subong nga gab-i nga nagsungka na ang driver nga involved sa insidente sa gasoline station kun sa diin nagpa-full tank ini apang nagpalagyo lang nga wala nagbayad.
Naga-edad sang 27-anyos ang driver kag gin-updan sang iya pamilya sang nag-surrender siya sa QCPD Station 1.
Antes sini, nauna na nga ginsiling sang awtoridad nga na-identify na nila ang driver kag ang salakyan paagi sa CCTV tracking kag koordinasyon sa iban nga mga ahensya sang gobyerno.
Sandig sa imbestigasyon, sang nag-viral na ang CCTV footage kun paano nagpalagyo ang salakyan, ginlimitahan naman sang driver ang iya paggwa kag naglikaw man ini pati sa social media.
Nagdepensa ini nga wala siya nakahibalo nga ginapangita na siya gali sang mga pulis. Pahayag pa sang driver, nagtinir lang siya sa ila balay sa San Jose del Monte, Bulacan.
Domingo sang kaagahon sang natabo ang insidente. Sakay ang suspek sa iya nga multi-purpose vehicle, nagpundo sa gas station sa EDSA, kag nag-request sang full tank sang diesel.
Nakit-an pa nga gintinguhaan ini nga lagson sang gasoline boy sang ginpalakat na sini ang salakyan nga wala nag-settle sang iya bill nga lab-ot sa P5,196.
Nauna na nga ginpahayag sang pulis nga may ipasaka nga estafa complaint paagi sa regular filing batok sa amo nga driver.#
