ILOILO CITY – Napasakaan na sang kaso ang driver sang Mazda MX5 sports car nga nakabunggu-patay sa mag-asawa nga school principal kag manunudlo sa Sen. Benigno Aquino Jr. Avenue, Mandurriao, Iloilo City.
Sa interview sang Bombo Radyo kay Police Master Sergeant Alfredo Masamong Jr., pinuno sang Traffic Investigation Unit sang Mandurriao Police Station, iya ginpahayag nga kaina sang hapon, napasaka na ang kaso nga reckless imprudence resulting to double homicide batok sa driver nga si June Paul Valencia.
Ginpahayag ni Masamong nga wala man sang epekto sa kaso ang indi pagpaidalom kay Valencia sa alcohol kag drug test bangud nga wala man napatuman sang husto ang Anti Drug and Drunk Driving Act.
Dugang pa sang natungdan, nagahimo naman sang lihok ang Land Transportation Office (LTO) agud nga mahatagan sang mabug-at nga silot si Valencia.
Matandaan nga sang damlag lang, patay ang mga biktima nga sanday Joe Marie kag Alnie Dinah Osano matapos nabungguan sang sports car nga ginamaneho ni Valencia samtang nagatabok sa pedestrian lane sa nasambit nga dalan nga mas kilala nga Diversion Road.
