Sa baylo nga selebrasyon kag kalipay sa iya ika-26 nga kaadlawan, kamatayon ang nagsugata sa isa ka helper sang isdaan matapos siya ginluthang sang iya amo sa Barangay Baybay Norte, Miag-ao sang Domingo, alas 11:20 sang gab-i, Mayo 31.
Ang biktima amo si alyas Alvin, 26 anyos samtang ang suspek naman amo si alyas Apa, 44 anyos, kasado kag tag-iya sang isa ka isdaan kun sa diin nagaobra ang biktima.
Lunsay mga residente sang nasambit nga barangay ang biktima kag suspek.
Sa interview sang Bombo Radyo kay PMaj. Richard Lao, hepe sang Miagao Municipal Police Station, iya ginpahayag nga naga-inom sa separar nga lugar ang ang biktima kag ang suspek apang nagkadto si alyas Alvin sa balay ni alyas Apa tungod ara man sa balay sang suspek ang mga grupo nila sa isdaan.
Dugang pa ni PMaj. Lao, nagsinabad si alyas Alvin sa panimalay ni alyas Apa kag didto na sang biktima gin-konpronta ang suspek sa wala mahibaluan nga rason.
Pahayag pa niya, matapos ang konprontahay sang biktima kag sang suspek, nagkuha sang armasluthang ang suspek sa sulod sang ila balay kag makaligad ang pila ka ginutlo, gintiro niya ang biktima nga naigo sa abaga kag ulo.
Gilayon nga gindala sa ospital si alyas Alvin apang gindeklarar nga dead-on-arrival sang mga doktor.
Kahapon, Hunyo 1, ginhingyo sang pamilya nga ipaidalom sa autopsy ang lawas sang biktima samtang nagpatigayon man sang paraffin test ang mga kapulisan batok sa suspek.
Sa subong, Hunyo 2, pasakaan na sang kaso nga murder si alyas Apa tungod positibo nga ginkilala ang suspek sang duwa ka eye witnesses.
