ILOILO CITY-Emosyonal samtang nagapangayo sang pasaylo ang driver sang wing van nga nabungguan sang isa ka tricycle sa radial road sa Brgy. San Vicente Leganes, Iloilo sa diin apat ang patay kag isa ang kritikal.
Ang mga napatay amo sanday Victor Sinaon, 43 kasado sang Brgy. Tigtig Sta Barbara Iloilo, nga amo ang driver sang tricucyle; pasahero sini nga sanday Reynaldo Consorio, 49, kasado sang Brgy. Tigtig Sta Barbara Iloilo kag Armando Mondero, 50 anyos, kasado kag residente sang Brgy. Barasan Este Sta. Barbara Iloilo.
Samtang kritikal naman si Julie Sison, legal ang edad, balo kag residente sang Brgy. Barasan Este Sta. Barbara Iloilo.
Sa exclusive interview sang Bombo Radyo kay Grogonio Saban Jr. 42, kasado sang Brgy. Buwang Lambunao Iloilo, iya ginpahayag nga nakahanda siya nga atubangon ang kaso sa tion nga pasakaan sang pamilya.
Apang nagalaom si Saban nga indi man siya pagpasakaan sang kaso bangud wala man siya sang sala sa diin siya ang ginbungguan sang tricycle sa naulihi nga bahin sang iya ginamaneho nga wing van.
Suno kay Saban, kuntani intindihon sang pamilya ang iya sitwasyon sa diin wala man niya ginhungod nga bungguan ang mga biktima.
Sa subong nagapabilin nga preso ang driver sa Leganes Municipal Police Station.
