Ginaduso sang Department of Social Welfare and Development (DSWD) nga dugangan ang cash grants nga ihatag sa mga benepisyaryo sang Pantawid Pamilyang Pilipino Program (4Ps) ilabi na bangud padayon man ang pagsaka sa presyo sang mga balaklon.
Suno kay DSWD Assistant Secretary for Disaster Response Management Group Irene Dumlao, nagapakig-angot na ang ahensya sa National Economic and Development Authority (NEDA) kag sa Philippine Statistics Authority (PSA) agud maninguha nga makita ang best index nga gamiton para sa automatic adjustment sang benepisyo.
Gina-angkla sang ahensya ini nga desisyon sa inflation rate sang Pilipinas nga naglab-ot sa 3.8 percent sang Abril halin sa 3.7 percent sang Marso.
Ang 4Ps amo ang national poverty reduction strategy kag human capital investment program sang gobyerno sang Pilipinas kun sa diin sa subong, yara sa 4.4 million household-beneficiaries ang gina-cater sa bilog nga pungsod.
Sa idalom sini nga programa, ang mga benepisyaryo ang makabaton sang cash grants kun makasunod sila sa kondisyon nga paeskwelahon ang mga bata, dal-on sa health centers para sa check-up, kag magtambong sa bulanan nga Family Development Sessions.
Ang family-beneficiaries nagabaton sang cash grant nga P300 kada bulan para sa bata nga naka-enrol sa daycare ukon elementary school; P500 kada bulan kun ang bata ang nagaeskwela sa junior high school kag P700 kada bulan naman kun yara ini sa senior high school. Ang kada benepisyaryo nga household ang makakuha sang P750 kada bulan sa health kag nutrition grants kag P650 kada bulan sa rice assistance.#
