ILOILO CITY- Nagpasalig ang Department of Social Welfare and Development – Region 6 nga indi na masulit pa ang natabo sa Iloilo Sports Complex sang Sabado kadungan sang una nga tagtaganay sang educational assistance sa mga indigent students.
Sa interview sang Bombo Radyo kay Atty. May Castillo, spokesperson sang DSWD Region 6, iya ginpahayag nga may mga arrangements na nga gina-finalize angot sa sistema nga ipatuman sa masunod nga Sabado agud nga indi na magdinaguso ang tawo kag malikawan ang kaangay nga scenario sa Iloilo Sports COmplex.
Suno kay Castillo, may yara man sang ginalauman nga amendments sa kwalipikasyon sang mga mahimo makabaton sang cash aid.
Sa subong suno sa DSWD-6 spokesperson, wala pa sang venue para sa masunod nga schedule sang distribution apang posible nga ibutang nalang ini sa Local Government Units.
Ang ihatag nga assistance amo ang mga masunod:
P1, 000 para sa mga elementarya;
P2, 000 para sa mga junior high school students;
P3, 000 para sa mga senior high school students; kag
P4, 000 para sa mga college students kag sa mga naga-eskwela sa vocational courses.
Ang mga kwalipikado nga mga indigent students amo ang mga masunod:
-ang kabataan ang halin sa pigado nga pamilya;
-bata ukon kabataan sang solo parents, PWDs, kag nagamasakit nga ginikanan;
-mga gin-abandonar nga kabataan;
-kag kabataan sang mga tricycle drivers, jeepney drivers, mga labandera, kabulig sa balay kag iban pa nga mga laborers.
Ang ini nga cash aide ang makuha tagsa ka Sabado nga magatakop sa Septyembre 24.
