Madinalag-on nga nakaguwa sa Red Sea ang duha ka dalagko nga oil tanker sang China nga may dala nga mga 4 million ka bariles sang krudo halin sa Saudi Arabia.
Ini paagi sa Bab el-Mandeb Strait kun sa diin apisar ginpatuman ang blockade kag mga pag-atake sang mga Houthi nga militante sang Yemen batok sa mga barko nga nagadala sang gatong halin sa Saudi.
Ang duha ka tanker nga Xin Long Yang kag Cosnew Lake nagkarga sang gatong sa pantalan sang Yanbu, Saudi Arabia, kag nagapadulong sa mga pantalan sa China.
Ginapadalagan ini para sa Unipec, ang trading arm sang Sinopec sang China, kag may sakay nga mga Chinese crew.
Ini natabo samtang nagapadayon ang tensyon sa Middle East nga nakaapekto sa pagbiyahe sang mga barko nga nagadala sang enerhiya sa bilog nga kalibutan.
Gindugangan sang mga Houthi ang ila pag-atake sa mga barko nga may kaangtanan sa Saudi Arabia, samtang ang away sa tunga sang Estados Unidos kag Iran nagdala naman sang daku nga problema sa pag-agi sang mga barko sa Strait of Hormuz.
Samtang, ang iban pa nga mga oil tanker sang Saudi naghina ukon nag-untat malapit sa Gulf of Aden agud malikawan ang ruta sa Red Sea bangud sa peligro sa seguridad.
