Paano kun nagkadto ikaw sa doktor agud magpa-opera apang lain ukon sala nga parte sang imo lawas ang ila nga nakuha?
Pat-od nga magalalain ka gid kaangay sang nabatyagan sang pasyente nga si George Piano, residente sang Lake Forest Park, Washington, USA, nga biktima sang ginapahayag “medical malpractice”.
Disyembre sang nagligad nga tuig sang nagkadto si Mr. Piano sa University of Washington Medical Center bangud sa abdominal pain.
Photo is grabbed from New York Post
Didto nahibaluan nga nagsuprer siya sang appendicitis gani ginpaidalom siya sa surgery agud makuha sang mga doktor ang iya nga appendix.
Suno sa legal counsel ni Piano, sang natapos na ang operasyon, sa baylo nga mag-ayo ang iya pamatyag, naglala pa gid ang sakit bangud sa ginpahayag paglapta sang iya nga bowel contents sa iya abdominal cavity.
Sang ginpaidalom sa CT scan, natukiban nga wala man nakuha ang iya appendix gani ginsulit naman ang operasyon sa amo gihapon nga ospital.
Base sa dokumento nga ginpasaka sa korte, sang una nga operasyon, nakakas sang doktor ang parte sang diverticulitis sa lower colon sang pasyente – kag indi sa appendix- rason nga nag-leak ang colon kag kinahanglan ang bag-o nga operasyon agud indi na maglala ang abdominal infection.
Bangud sa hitabo, ginpahayag ni Mr. Piano nga masobra 50 ka adlaw gid ang iya pagpa-ospital, 40 pounds gid ang ginbuhin sa iya bug-at, nagsuprer siya sang anxiety kag amo man sang short-term memory loss.
Bangud sini, nagpasaka siya kag ang iya asawa sang kaso nga medical malpractice batok sa ospital kag sa duha ka doktor nga una nag-opera sa iya nga amo sanday Nidhi Udyavar kag Paul Herman.
Nagapanukot ang mag-asawa sang monetary damages kag nag-demand man sang jury trial sa amo nga kaso.#
