Natalana nga aprubahan sang Kamara sa final reading subong nga semana ang duha ka iban pa nga hagna nga gina-konsiderar ni President Ferdinand Marcos Jr. nga “prayoridad” sang administrasyon.
Ini amo ang Philippine Salt Industry Development bill kag ang Bureau of Immigration Modernization bill.
Suno kay House Speaker Martin Romualdez, ang Philippine Salt Industry Development bill nagatuyo nga buhion ang tagumatayon nga industriya sang asin sa Pilipinas ilabi na bangud naga-import pa ang pungsod para sa suplay.
Sa pihak nga bahin, tuyo naman sang Bureau of Immigration Modernization bill nga ma-update na ang 83-anyos nga layi sang Pilipinas nga amo ang Philippine Immigration Act of 1940 nga gintukod pa sang Commonwealth-era.
Magluwas nga i-update ang layi sang pungsod agud nga matapna ang mga krimen kaangot sa immigration kaangay sang smuggling, illegal recruitment, kag human trafficking, tuyo man sini nga hagna nga i-update man ang sweldo sang immigration personnel.
Kun maaprubahan na ini nga hagna, mahimo na nga 33 ang aprubado nga priority measures sang Marcos Jr. administration sa Kamara. Nahibaluan nga 42 ang yara sa lista sang prayoridad.
May tatlo ka iban pa nga priority measures nga nakatalana para sa second-reading approval antes ang break sang Kongreso. Ini amo ang Natural Gas Industry Enabling Law, ang National Employment Action Plan, kag ang Philippine Ecosystem and Natural Capital Accounting System Bill. #
