Nalakip ang duha ka menor de edad sa tatlo nga gin-detain kaangot sa natabo nga pagpangluthang kadungan sang Super Bowl celebration rally sang Kansas City Chiefs sa Missouri, United States of America.
Suno sa otoridad, na-recover man ang wala pa natumod nga numero sang mga armas.
Natalana pa nga ipasaka ang kaso suno sa pulis apang subong, nagapadayon pa ang imbestigasyon.
Pahayag naman sang Kansas City Police, natumod na tanan ang 23 ka mga biktima lakip na ang 43-anyos nga iloy nga amo ang isa nga napatay.
Ang iban pa nga 22 ka mga biktima ang naga-edad otso tubtub 42 anyos, kun sa diin sandig sa datos nga ginauyatan sang otoridad, katunga sini nga numero ang mas manubo sa 16-anyos ang mga edad.
Nagaguwa man sa imbestigasyon nga personal nga away sang pila ka tawo ang rason sang ginamo apang wala man sang report nga ini ang naangot sa terorismo ukon homegrown violent extremism.
Matandaan nga natabo ang insidente Myerkules (oras sa Missouri) sang nagtipon ang linibo-libo ka mga tawo para sa parada bangud sa kadalag-an sang Kansas City Chiefs sa bag-o lang nagtakop nga Super Bowl.
Kasunod sini, nagpadala man sang mensahe sang simpatiya si US President Joe Biden kag liwat naghingyo sa Kongreso nga mas istriktuhon pa ang layi para sa pagdala sang mga tawo sang armas.
“The epidemic of gun violence is ripping apart families and communities every day. Some make the news. Much of it doesn’t. But all of it is unacceptable,” suno sa presidente. “We have to decide who we are as a country. For me, we’re a country where people should have the right to go to school, to go to church, to walk the street — and to attend a Super Bowl celebration — without fear of losing your life to gun violence.”##
(Photo: JAMIE SQUIRE/GETT)
