Ginlubong na sa Libingan ng mga Bayani sa Fort Bonifacio, Taguig City ang duha ka mga piloto sang Philippine Navy nga napatay bangud sa pagtibusok sang ila ginasakyan nga helicopter.
Natabo ang aksidente sang Huwebes sang aga sa Cavite City kun sa diin ang mga biktima amo sanday Lieutenant Jan Kyle Borres kag Ensign Izzah Leonah Taccad.
Una nga gintago sa publiko ang ila nga mga pangalan tubtub nga napahibalo na sang Armed Forces of the Philippines ang ila tagsa ka pamilya kaangot sa trahedya.
Ang duha ka naval aviators ang lunsay na-assign sa Naval Air Wing sa Sangley Point.
Suno sa Navy, halin ang trainer helicopter sa Sangley Airport sa Cavite. Kinahanglan kuntani sini nga mag-emergency landing apang nagtibusok malapit sa Cavity City Public Market sang ginabanta 6:00 sa aga.
Gindeklarar nga patay ang 36-anyos nga lalaki nga piloto sang nag-abot sa Cavite Medical Center samtang ang 27-anyos naman nga babaye nga co-pilot ang ginbawian sang kabuhi samtang ginabulong sa Bautista Hospital.
Una na nga ginpahayag sang otoridad nga may investigation team nga gintukod si Commodore Juario C. Marayag, commander sang Naval Air Wing, agud matumod ang rason sang helicopter crash.#
