Ginkumpirma sang Department of Foreign Affairs (DFA) nga may duha ka mga Pinoy nga nalakip sa una nga grupo sang foreigners nga ginpahanugutan nga makaguwa sa Gaza Strip kag makatabok sa Egypt.
Suno kay DFA Undersecretary Eduardo de Vega, ini nga Filipinos ang lunsay naga-trabaho sa international humanitarian organization nga Doctors without Borders.
Photo: [Hatem Ali/AP Photo]
Pahayag pa sang opisyal, ang otoridad sa Egypt na mismo ang maga-proseso para sa pagsulod sang tanan nga foreigners nga ginpahanugutan nga makaguwa sa Strip.
Padayon man suno sa iya ang pagpakig-angot sang Pilipinas sa Israel agud hingyuon nga hatagan sang prayoridad ang mga Pinoy sa mga nationalites nga una nga makaguwa sa amo nga teritoryo sang Palestine nga subong sentro sang pagpang-atake sang Israel bilang balos sa Hamas militants.
Sini lang nga adlaw sang temporaryo nga ginbuksan ang Rafah Border (naga-angot sa Egypt kag Gaza) agud mapasugtan ang limitado nga numero sang foreign nationals kag mga pilason nga mga tawo nga makapalagyo.
500 ka tawo ang ginalauman nga makahalin sa Gaza subong nga Myerkules paagi sa amo nga border kun sa diin ang mga may samad ang mahimo maka-diretso sa field hospital sa Sheikh Zuwayed sa Sinai nga gin-preparar mismo sang Egypt.
Matandaan nga Oktubre 15 sang ginpasaka sang DFA sa Alert Level 4 ang status sa Gaza — buot silingon, mandatory na ang repatriation para sa mga Pinoy sa amo nga lugar. #
