Ginbuy-an sang Hamas militants ang duha ka iban pa nila nga mga bihag sa Gaza Strip.
Ini na ang ikaduha nga tion nga may ginhilway nga hostages ang Hamas militants halin sang ila ginsalakakay ang Southern Israel sang Oktubre 7 sang aga, gindala ang masobra 200 ka hostages sa Gaza (lakip na ang kabataan, foreigners, kag dual nationals), kag sunod nga natabo ang pagtimalos sang Israel kun sa diin masobra 4,000 na ang nagkalamatay nga Palestinians.
Nurit Cooper (left) and Yocheved Lifshitz. (courtesy)-via The Times of Israel
Ang pinakaulihi nga ginbuy-an nga hostages ang natumod sang Israeli media nga sanday Yocheved Lifshitz, 85, kag Nurit Cooper, 79, nga halin sa Israeli kibbutz of Nir Oz.
Sa statement sang Hamas, ginsiling nga ila ginhilway ang duha sa ngalan sang “humanitarian reasons.”
Antes sini, nauna na ang Israel, world leaders, kag mangin si Pope Francis sa pagpanawagan nga ipang-release na ang mga sibilyan nga ginatago sang Hamas militans.
Sa inisyal nga impormasyon, nagbulig sa pagpa-release sang duha ang Qatari kag Egyptian mediation, kag ang International Red Cross.
Antes sini, matandaan nga ang duha ka nauna ginbuy-an nga hostages amo ang American nga mag-iloy nga sanday Judith Tai Raanan kag Natalie Raanan. #
