Nagpangabay si outgoing President Rodrigo Duterte sa pulis kag sa militar nga padayunon ang away kontra sa iligal nga droga sa Pilipinas.
Suno kay Duterte, may kahangawa gihapon siya bangud apisar sang ginhimo sang iya nga administrasyon, daku sa gihapon nga volume sang droga ang makumpiskar sang mga pulis.
Ginatumod sini ang P12 billion nga balor sang iligal nga droga nga nakuha sang otoridad sang bulan sang Marso.
Narecover ang alleged high-value shabu sa mga selyado nga sako nga may Chinese markings, samtang 10 naman ka mga lalaki sa sulod sang van ang gin-aresto.
Ginapahayag nga 600 ka Chinese teabags ang gingamit bilang suludlan sang amo nga contraband nga nagabug-at tanan sang 1.5 metric tons.
Sa bahin sang presidente, gin-abi abi sini ang mga pulis kag militar nga naga-trabaho gihapon agud mapapas ang iligal nga droga apisar nga iban nga myembro sang PNP ang makabig nga skalawag kag naga-involve man sa baligyaanay sang droga.
Si Duterte ang subject sang nasuspinder nga imbestigasyon sang International Criminal Court bangud sa ginaalegar nakomiter nga crimes against humanity samtang nga ginpatigayon ang war on drugs sa idalom sang iya nga administrasyon.
