Naghatag sang clue si anay Presidente Rodrigo Duterte nga posible nagapanago si Pastor Apollo Quiboloy sa mga propiedad sang Kingdom of Jesus Christ sa Barangay Tamayong sa Calinan District, Davao City.
Ginbuyagyag ni Duterte ini nga posible nga lokasyon samtang nga nagahatag sang iya nga laygay sa pastor nga kontrobersyal subong matapos gindagdagan sang arrest warrants kag arrest orders halin sa regional trial courts kag halin sa Senado.
“Ang Tamayong malaki ‘yan, sa loob maraming bahay. Make sure na sa isang bahay nandiyan siya because for every bahay it should be a different search warrant,” pahayag ni Duterte.
Magluwas sa gin-mensyonar nga Tamayong nga daku nga barangay suno kay Duterte, posible nga yara man si Quiboloy sa compound sang Kingdom of Jesus Christ sa Buhangin District malapit sa Davao International Airport.
Ginpanginwala man sang anay presidente nga kahimbon siya ni Quiboloy kag ginatago niya ini sa ila nga balay. Pananglitan magsungka ini sa iya suno kay Duterte, indi niya ini pagbatunon bangud indi man siya ang otoridad kag indi man siya ang nagadala sang warrant.
“Hindi ko siya tatanggapin. Hindi ako ang authority. Hindi ako ang nagdadala ng warrant,” suno sa anay presidente.
Kahapon sang nagpaguwa ang korte sang Pasig sang warrant batok kay Quiboloy kag lima ka iban pa bangud sa qualified human trafficking.
Sang Abril 3, nag-isyu man ang Davao City court sang warrant batok kay Quiboloy bangud sa child kag sexual abuse.
Una na nga gin-athag sang NBI nga isa na subong ka pugante ang status sang pastor.#
