Apisar nagahina na ang El Niño, may 47 pa ka mga probinsya nga maka-eksperyensya sang drought subong nga bulan sang Mayo sandig sa advisory sang state weather bureau nga Philippine Atmospheric, Geophysical and Astronomical Services Administration (PAGASA).
23 diri ang nahamtang sa Luzon, 15 sa Visayas, kag siyam naman sa Mindanao. Pito naman sa mga probinsya ang posible nga mapaidalom sa dry spell kag walo ang may dry condition.
Gina-antisipar sang weather bureau nga matabo subong nga Mayo ukon sa Hunyo ang transition sang El Niño pakadto sa neutral conditions.
Nagapabilin man ang La Niña watch bangud 60% gihapon ang posibilidad sang pagporma sang La Niña ukon sobra-sobra nga pag-ulan sa second half sang 2024.
Una na nga ginpahayag sang PAGASA nga ang kumbinasyon sang epekto sang El Niño kag dry season ang nag-resulta sa drought sa 46 ka mga probisya, 19 ang may dry spell, kag siyam ang may dry condition sang nagligad nga Abril.
Ang estimated nga balor sang halit sa agrikultura ang nagdangat naman sa P5.9 billion base sa reports sang National Disaster Risk Reduction and Management Council kag Department of Agriculture (DA). Lakip sa pinakaapektado suno sa records amo ang Western Visayas.#
