Masobra na sa 50 ka humanitarian leaders halin sa 19 ka mga pungsod ang nagkumpirma sang ila nga pagtambong sa emergency peace summit sang humanitarian organization nga We Care for Humanity.
Ini nga peace summit ang patigayunon bwas, Abril 19, kag iga-host sa US kag Qatar.
Suno kay Bombo International Correspondent Joseph Rivera, Country Director sang We Care for Humanity sa Qatar, iya ginpahayag nga may magatambong man nga former prime ministers apang wala sang aktibo nga political leader sa ila pagtilipon agud malikawan ang political bias.
Ang nagapanguna nga tuyo sang ila peace summit suno kay Rivera amo nga ipanawagan sa mga gamhanan nga pungsod nga untatan na ang gyera agud malikawan ang madamo nga casualties.
Suno kay Rivera, matapos ang ila pagtilipon, maga-isyu sila sang joint peace statement nga amo ang ipadala sa United Nations kag sa concerned governments nga amo ang may mayor nga papel sa gyera sa Middle East. Ginmensyonar sini ang Estados Unidos sang Amerika, Iran, Israel, Lebanon, kag Yemen.
Suno kay Rivera, luyag sang organisasyon nga ipahanumdom sa sini nga mga pungsod nga labaw sa pulitika, bugal, ekonomiya, kag mga hinganiban, ang pinakadaku nga madula sa sini nga gyera amo ang kabuhi sang katawhan.
Nahibaluan nga ini na ang pangatlo nga emergency peace summit sang organisasyon.
Ang una nga pagtilipon natabo sang 2023 sang nag-ibwal ang gyera sa tunga sang Israel kag Hamas sa Gaza; kag ang ikaduha ginpatigayon sang 2025 sang ginbombahan man sang Estados Unidos ang nuclear facilities sang Tehran.
Ang We Care for Humanity isa ka nonprofit organization nga ang headquarters nahamtang sa California, Illinois, kag Nevada kag may mga branch sa masobra 20 ka mga pungsod.#
“WCH is globally respected for its dedication to addressing critical global issues aligned with the United Nations Sustainable Development Goals (UNSDG). These goals include ending poverty and hunger, promoting quality education, ensuring access to clean water, advocating for gender equality, combating climate change, and supporting peace and stable institutions,” suno pa sa website sang amo nga organisasyon.#
