ILOILO – Natalana nga mangin epektibo na sa Sabado, Marso 20, ang gin-amyendaran nga executive order ni Iloilo Governor Arthur Defensor Jr. nga naga-require sang negative Reverse transcription polymerase chain reaction (RT-PCR) test result para sa tanan nga byahero nga magasulod sa probinsya sang Iloilo.
Santo sa Executive Order 183-M, ang negative RT-PCR test result ang kinahanglan i-secure sang byahero sang indi magsobra 72 hours ukon tatlo ka adlaw antes ang petsa sang pagbyahe.
Wala pa nadala sa sini nga pagsulundan ang mga Authorized Persons Outside Residence (APOR) bangud ginahulat pa nga maaprubahan sang National Inter-Agency Task Force (NIATF) ang hingyo sang mga local chief executives sa Western Visayas nga i-require man ang negative result sang RT-PCR test para sa ila.
Sa interview sang Bombo Radyo kay Defensor, iya ginpahayag nga ang iya executive order ang may kaangtanan sa nahisugtan sang local chief executives sa Western Visayas sa ila virtual meeting sang Marso 15 may kaangtanan sa uniform travel protocols sa rehiyon.
Una na ginpahayag sang Regional Task Force on COVID-19 nga ang desisyon sang kalabanan nga mga local chief executives sa Western Visayas nga irequire ang negative RT-PCR test result ang kasunod sang nagatimbuok nga kaso sa iban nga rehiyon ilabi na sa National Capital Region (NCR).
