Wala nadulaan sang paglaum ang isa ka estudyante nga tumandok sang Brgy. San Francisco, Anini-y, Antique nga naga-eskwela subong sa West Visayas State University sa Iloilo City, apisar nga gintagaan ini sang dako nga pagtilaw sa iya nga kabuhi.
Ini amo si Paul Stanford Loquias, nga na diagnose sa sakit nga Arteriovenous Malformation kun sa diin nagakatabo kun may ara sang abnormal blood flow sa ulo sang isa ka tawo.
Sa interview sang Bombo Radyo kay Loquias, iya ginpahayag nga sang tuig 2024, gulpi na lang ini nga natumba sa ila klase kun sa diin gindala ini sa ospital bangud indi na sini mahulag ang iya lawas.
Gin-operahan man ini pagkatapos sang pila ka therapy kag sang nagbalik na sya sa pag-eskwela sa kolehiyo sini lamang nga Marso 2026 samtang naga-demo ini sa isa ka eskwelahan sa probinsya sang Iloilo gulpi lang ini liwat nga nagcollapse kag gindala sa ospital.
Apisar nga wala nagakadulaan sang pagtilaw bangud sa kahimtangan sang iya ikaayong lawas, padayon ini sa gihapon nga nagatuo sa Diyos nga sa pila ka adlaw mangin maayo na ang tanan para sa iya.
Sa subong, aktibo ini sa gihapon nga myembro bilang lector, commentator amo man bilang choir kag dancer sa ila simbahan.
Nagapasalamat man ini sa mga tawo nga padayon nga nagbulig sa iya agud nga matalampuwasan sini ang mga pagtilaw nga gina-agyan sa kabuhi.
