Posible nga ma-umpisahan na subong nga adlaw, Abril 25, ang amat-amat nga pag-evacuate sa nabilin nga mga overseas Filipino workers (OFWs) halin sa Sudan.
Kun basehan ang pahayag sang Department of Foreign Affairs (DFA) kahapon, umpisahan ang evacuation sa sulod sang 24 oras.
Suno kay Foreign Affairs Undersecretary Eduardo Jose De Vega, kada batch ang pag-evacuate — pwede mag-byahe sakay sa bus padulong sa Egypt, ukon pwede man nga mag-agi sa dagat padulong naman sa Port of Sudan.
Suno pa sa DFA, may yara na sang gin-arkilahan nga evacuation buses kun sa diin posible maglawig sang 15 ka oras ukon mas malawig pa ang byahe padulong sa southern Egypt.
Dal-on ang evacuees sa syudad sang Aswan kun sa diin may airport pa-Cairo.
Gin-update man sang ahensya nga may 696 ka mga rehistrado nga Pinoy sa Sudan, kag 156 diri ang may yara na sang travel documents kag handa na nga i-evacuate sa bisan ano nga oras.
Suno sa Philippine embassy sa Cairo, Egypt, 300 Filipinos ang nagpangayo sang bulig agud nga ma-rescue.
Una na nga ginpahayag nga may tatlo ka Pinoy nga naga-trabaho sa airline sang Saudi nga naka-base sa Sudan ang una na nga nadala sa evacuation paagi sa bulig sang Saudi Arabia.
Nahibaluan nga ginatos na ang patay kag linibo ang nasamaran bangud sa nagapadayon nga away sa tunga sang Sudanese forces kag paramilitary groups sa kapital nga syudad nga Khartoum.
