Gin-anunsyo sang Malacañang ang pag-appoint kay retired Court of Appeals (CA) Justice Melchor Quirino Sadang bilang bag-o nga chairman sang Presidential Commission on Good Government (PCGG).
Siya ang magapamuno sa panel nga amo ang may katungdanan sa pag-recover sang ginaalegar nga ill-gotten wealth sang Marcos family kag ila cronies sang tion sang diktadurya sang amay ni President Bongbong Marcos nga si anay Presidente Ferdinand Marcos, Sr.
Ang PCGG ang natukod kasunod sang 1986 EDSA People Power Revolution kag sakop pa ini sang Department of Justice.
Nahibaluan nga yara na sa P174 billion ang nakuha sang gobyerno halin sa ill-gotten wealth sang mga Marcos, apang may ginalagas pa nga P125 billion.
Natalana pa nga mag-release sang statement si President Marcos kun ngaa napilian sa posisyon si Sadang.
Nangin kabahin man ini anay sang panel nga amo ang nag-review sang courtesy resignations nga ginpasa sang police officials sang Pebrero 2023. Nangin Court of Appeals justice siya halin sang 2011-2017 kag nangin presiding judge sang Cavite City Regional Trial Court halin sang 2000-2011.
Lakip sa nauna nga PCGG commissioners nga una na nga gin-appoint ni Marcos amo sanday former Abra mayor Marco Bautista, former Metropolitan Manila Development Authority executive director Angelito Vergel de Dios, kag ang abogado nga si Atty. Rogelio Quevedo nga isa sa nagkwestyon sang nalutos si Marcos sa 2016 vice-presidential race.
Si Sadang amo ang nagbulos kay Atty. John Agbayani nga amo ang katapusan nga appointee sang Duterte administration sa PCGG.
