ILOILO CITY – Balik presuhan ang isa ka lalaki matapos nga nabaklan sang halos tunga sa milyon nga balor sang iligal nga droga sa ginpatigayon nga drug buy-bust operation sang Iloilo City Drug Enforcement Unit sa Barangay Sambag Jaro, Iloilo City.
Ang arestado amo si Danilo Almores, 41, residente sang Barangay Bakhaw, Mandurriao, Iloilo City kag makabig nga high value individual.
Arestado man si Wera Divinagracia, 29, residente sang Barangay Lapuz Sur, Iloilo City.
Nakuha sa duha ang ginbanta 70 grams sang shabu nga may standard drug price nga P 476,000.
Sa interview sang Bombo Radyo kay Police Captain Val Cambel, team leader sang operating team, iya ginpahayag nga sang nagliligad nga tuig, naka-agi na preso si Almores may kaangtanan sa iligal nga droga kag nakagwa nagikan sa New Bilibid Prison.
Sa subong, preso na sa Jaro Police Station ang duha kag natalana nga pasakaan sang kaso nga paglapas sa Republic Act 9165 ukon Comprehensive Dangerous Drugs Act of 2002.
