PAVIA, ILOILO – Gindakop sang otoridad si anay Provincial Administrator Manuel ‘Boy’ Mejorada sa iya balay sa Parc Regency Subd., Brgy. Balabag, Pavia, Iloilo.
Mismo si Mejorada ang nagkumpirma sa Bombo Radyo nga ginserbehan siya sang warrant of arrest.
Suno kay Mejorada, mismo si Police Major Jonathan Pinuela sang Provincial Special Operations Group (PSOG), ang nagdahu sa iya sang warrant of arrest.
Pagkatapos nga mahatag ang kopya sang warrant of arrest, gilayon siya nga ginposasan ni Pinuela kag hana nga tayaan sang armas-luthang.
Ginkwestyon man sang anay Provincial Administrator kun nga-a kaina sang kasisidmon lang ginserbe ang warrant of arrest.
Suno naman kay Police Major Jonathan Pinuela sang Provincial Special Operations Group (PSOG), lima ka warrant of arrest ang ginserbe kay Mejorada.
Ginpahayag ni Pinuela nga ang mga warrant of arrest ang may kaangtanan sa paglapas ni Mejorada sa Republic Act 10175 ukon Cybercrime Prevention Act of 2012.
Nagpaathag naman si Pinuela kun nga-a subong lang nga Biyernes sang kasisidmon ginserbe ang mga warrant of arrest.
Ini bangud nga suno kay Pinuela, subong lang nila natabu-an si Mejorada nga yara sa ila balay.
Nahibalu-an nga ang kaso nga ginkaulamiran ni Mejorada ang ginpasaka ni Iloilo Governor Arthur Defensor Sr. bangud sa pagtawag sa iya sang provincial administrator/blocktimer nga makawat.
Sa medical examination, nagtaas ang blood pressure ni Mejorada matapos ginserbehan sang warrant of arrest.
