Ginkalipay sang mga pamilya sang drug war victims ang desisyon sang International Criminal Court (ICC) Pre-Trial Chamber I nga ipasaka sa full-blown trial ang kaso ni former President Rodrigo Duterte.
Kahapon sang gin-anunsyo sang Chamber nga unanimous ang desisyon sang judges nga i-confirm ang tanan nga kaso nga crimes against humanity batok kay Duterte kasunod sang hearing sang nagligad nga Pebrero kun sa diin nag-presentar ang prosekusyon, ang defense, kag ang mga abogado sang drug war victims.
Sa interview sang Bombo Radyo kay former Bayan Muna Party-list Rep. Atty. Neri Colmenares, ang isa sa mga nagarepresentar sang pamilya sang drug war victims, iya ginpahayag nga madugay nga tion ang ginhulat sang pamilya antes na-commit sa trial si Duterte bangud tuman ka damo ang ginhimo sini agud ma-delay ang proseso.
“Ang pamilya, gahugyaw gid ya eh, kay kadugay-dugay na sini,” suno kay Colmenares.
Pahayag pa sini, 2018 pa gin-file ang kaso nga crimes against humanity.
Sang Nobyembre 2021, sang presidente pa si Duterte, nag-request na ini nga i-suspend ang imbestigasyon sang ICC sa rason nga naga-function man ang domestic judicial system — bagay nga gin-grant man anay sang korte.
Bisan sang yara na sa ICC ang kaso, Septyembre 23, 2025 kuntani ang orihinal nga petsa sang confirmation of charges apang na-atrasar man bangud sang mga petisyon sang kampo ni Duterte sa interim release nga ginpasugtan man sang ICC para sa due process.
“Te ginpagbigyan sang ICC ang due process para kay Duterte, kag siguro naman, enough na. Kag para man sa interes man ni Duterte dapat nga madasig ang trial kay naka-preso siya mo. Usually ang tawo nga nagaka-preso, gusto ya speedy trial. Si President Duterte ya, baliskad, gina-delay ya nga gina-delay ang trial. We are happy that the charges are confirmed,” suno sa anay kongresista.
Nahibaluan nga sa idalom sang pagsulundan sang ICC, dapat nga ang Trial Chamber ang bug-usan sang lain na naman nga set sang tatlo ka judges para sa full-blown trial.
Kasunod sang desisyon sang PTC I, indi gilayon maka-apelar ang kampo ni Duterte apang mahimo sila makapangayo sang authorization agud nga maka-himo sang appeal.
Sa Article 63 sang Rome Statute, required ang akusado nga tawo nga magtambong kadungan sang trial.
Matandaan nga wala nagtambong si Duterte sa confirmation of charges hearing sang Pebrero. Sang Abril 22, wala man ini nagsipot sang ginbasa ang desisyon sang Appeals Chamber sa iya apelar kaangot sa hurisdiksyon sang ICC sa iya kaso.#
