Nadumduman ni Ombudsman Jesus Crispin “Boying” Remulla ang mga nobela ni Dr. Jose Rizal nga Noli Me Tangere kag El Filibusterismo sang ginpamangkot siya natuhoy sa SONA anay ni President Ferdinand “Bongbong” Marcos Jr. kaangot sa flood control corruption.
Pahayag ni Remulla, ang Noli Me Tangere kag El Filibusterismo amo ang nagpukaw sang sentimyento sang mga Pilipino batok sa Espanya kag sa ila nga mga pagpang-abuso.
“‘Yon ang nagsimula ng pagpukaw ng utak ng tao na hindi na puwede ‘yong ginagawa ng mga Kastila no’ng araw. ‘Yong ginawa ng presidente last year is something similar: ‘dapat tumigil na ‘yan, mahiya naman kayo’,” suno kay Remulla.
Madumduman nga isa ka tuig na halin sang ginbuy-an ni Marcos ang “mahiya naman kayo” nga linya sa iya nga State of the Nation Address nga naka-address sa mga involved sa kurapsyon sa flood control projects.
Ginkwestyon man si Remulla kaangot sa ginapahayag nga mahinay nga pagpasaka sang kaso.
Pahayag ni Remulla, kun mag-file sila sang kaso, ginasigurado anay nila nga kumpleto kag masarangan na nga panindugan.
“Kailangan ang preparasyon, kumpleto talaga,” suno sa Ombudsman chief.
